Próxima actividade: Camiñata Pena Anamán

A próxima actividade que están preparando os Veteranos da Baixa Limia será facer unha camiñada desde Venceáns, o pobo de Xavier, ata a Vila de Castro Laboreiro, pasando polo dolmen da Casa da Moura e o imponente petouto da Pena da Anamán.

A idea constiste en seguir un dos infinitos pasos do "contrabando de supervivencia" que houbo na nosa zona.

Os atractivos da ruta son innumerables, pero tal vez conveña destacar dous: o dolmen da Casa da Moura, nun bo estado de conservación e que non lle desmerece en nada a outros de máis sona. Espetada no alto da serra está a mole granítica da Pena da Anamán, un dos tótems da Baixa Limia; se prestades algo de atención aínda poderedes ver a silueta do Tomás das Quingostas, o noso Curro Jiménez, escondéndose detrás dos penedos.

Tanquilos, tampouco nos esquecemos da paisaxe, pero eso, na Baixa Limia, ¿fai falta recordalo?

A "meta" estará situada na Vila de Castro Laboreiro, onde haberá que repoñer forzas. E que mellor forma de facelo que con bo bacalhao.

As datas que se están manexando son as de Semana Santa. Non está aínda fixado o día exacto, pero por aí. ¿Que tal o domingo 5 ou o Xoves Santo 9?

Os que esteades interesados facédeo saber, por exemplo a Plácido. Lembrade que a nosa forma física nos últimos partidos ten fallado algo e seguramente o noso entrenador Galán verá con bos ollos esta camiñata para ver se mellora.


Animádevos

Baixa Limia - Terras de Bouro

O sábado 28 de febreiro en Lobios celebrouse un dos tradicionais encontros anuais entre os Veteranos da Baixa Limia e os veciños de Terras de Bouro, comandados polo amigo Julio. O partido foi moi disputado por ambos bandos, pero presidido pola deportividade de sempre, aínda que houbo que lamentar algunhas lesións de certa gravidade, accidentais eso si.

O resultado nesta ocasión foi favorable ós da Baixa Limia por 2-0, con goles do "goleador de goleadores" Mariño, logo dun centro milimétrico de Cinco, e do escurridizo Xaxo, cunha sutileza exquisita. É importante destacar o excelente plantexamento táctico do "coach" Galán, un home sabio, como demostra o feito de que, ante a previsible falta de sincronización dos seus xogadores, decidíu actuar de árbitro, para estar máis preto do xogo e facer chegar máis facilmente as súas consignas. Abofé que o conseguíu.

A cea de confraternización, moi animada, tivo lugar no Restaurante Lusitano de Lobios, onde Javier, un dos nosos socios, nos ofreceu un "reparador" banquete coa calidade de sempre. Non faltaron os típicos comentarios postpartido, sobre o árbitro e a súa doble función; a seguridade dos porteiros, que impedíu un marcador máis abultado; as subidas pola banda de Pepe da Feiravella, que causaban espanto no rival; os quilómetros que fai Sierra no partido; a inoportuna recaída da lesión de Valentín; a contundencia de Sindo; o cambio de posición de Gayol, terror de dianteiros e agora tamén de porteiros, ...

Aquí tedes algunhas fotos

Todo baixo control para o gran capitán, Plácido

"Goleador de goleadores", Mariño

A loita sen cuartel de Pena

A concentración extrema de Narín

Presentación

EMBAIXADORES ALTRUÍSTAS DO PARQUE NATURAL DA BAIXA LIMIA

Toda a Baixa Limia (Muiños, Entrimo, Lobios, Bande, Lobeira) unida . A utopía que os políticos nunca alcanzan, consíguenna os Veteranos da Baixa Limia co fútbol como excusa. Sen localismos absurdos, sen protagonismos, continúan (e xa van moitos anos) a levar con orgullo o nome da súa terra por onde van.
Do seu bo facer poderían dar conta en moitos lugares, en Portugal (Vila do Conde, Caldas da Raíña, Melgaço, Terras de Bouro, Montalegre, …), Puebla de Sanabria, Segovia, Vilalba, Viveiro, Xinzo, Lalín, Mondoñedo, Manzaneda, Tui, A Gudiña … e ata en Cuba. E tamén quen os ten visitado, entre os que hai equipos de postín coma o Atlético de Madrid ou o Celta. Gañan e perden, pero sempre ten prioridade a deportividade, a amizade, a camaradería e … as moitas risas, os principios que un día motivaron a súa creación.
¿E como se financian? Case exclusivamente coas súas aportacións particulares; así pagan os seus desprazamentos en autobús, as comidas de confraternización e demáis gastos.
Terá que chegar a hora na que as autoridades da zona se dean conta da importante labor que están a facer e os axuden a continuar a bonita tarefa divulgativa da Baixa Limia.